Grásleppa

Veiðar á grásleppu eru bannaðar nema með sérstökum veiðileyfum sem gefin eru út af Fiskistofu. Eingöngu er heimilt að veita slík veiðileyfi þeim bátum sem áttu rétt til grásleppuveiða á vertíðinni 1997, og bátum sem komið hafa í þeirra stað.

Veiðileyfi til grásleppu eru gefin út til 50 samfelldra daga á hverri vertíð. Hvert leyfi er bundið við ákveðið veiðisvæði og þarf að tilgreina í umsókn hvenær lagning neta hefst og telja dagarnir frá þeim degi. Eingöngu er hægt að fá eitt grásleppuleyfi á hvern bát á hverri vertíð. Upplýsingar um veiðisvæði má sjá hér. Grásleppuhrognum er skylt að landa og vigta á hafnarvog og niðurstöður vigtunar skráðar í aflaskráningarkerfið GAFL. Heildarþyngd er vigtuð, en við skráninguna dregst þungi íláta frá auk 20% „sulls” sem reiknað er af hrognunum. Í lok vertíðar þarf að skila til Fiskistofu svokölluðum vigtar- og ráðstöfunarskýslum með upplýsingum um rástöfun og verðmæti hrognanna. Eyðublöð fyrir þetta er að finna hér.

Ekki er heimilt að stunda á sama tíma netaveiðar á grásleppu og netaveiðar á þorski. Krókabátum er í sömu veiðiferð óheimilt að stunda veiðar á hrognkelsi og aðrar veiðar með krókaveiðafærum.

Heimilt er að flytja rétt til grásleppuveiða á milli báta. Það er þó bundið ákveðnum skilyrðum:

• Báturinn sem réttindin eru flutt frá þarf að hafa haft réttindin í a.m.k. eina vertíð.
• Ekki má flytja réttindin til báts sem er meira en 2,5 brúttótónnum stærri en báturinn sem flutt er frá og aldrei til báts sem er stærri en 15 brúttótonn.
• Sama regla gildir um breytingar á bátum, ekki má gefa út leyfi til grásleppuveiða til báts sem stækkaður hefur verið umfram 2,5 brúttótonn, nema að til bátsins hafi verið flutt réttur til veiða af öðrum báti sem er a.m.k. jafn stór í brúttótonnum og stækkunin sem af breytingunni leiðir, og ekki má stækka bát þannig að hann verði stærri en 15 brúttótonn.

Réttindi til grásleppuveiða fylgja báti við sölu hans nema annað sé sérstaklega tekið fram í kaupsamningi, og það tilkynnt Fiskistofu innan 30 daga frá sölu.

Fiskistofa vekur athygli á því að vigta skal og skrá í Gaflinn allan rauðmaga sem kemur að landi.

Einnig bendir Fiskistofa á að öll sjávarspendýr og fuglar sem koma í grásleppunet eigi að færast í afladagbók.