Frístundaveiði

Frístundaveiðar er eingöngu heimilt að stunda með sjóstöng og handfærum án sjálfvirknibúnaðar. Leyfin eru ætluð fyrir aðila í ferðaþjónustu og þarf ferðaskipu­leggjandaleyfi frá Ferðamálastofu að fylgja umsókn um frístundaveiðileyfi. Frístundaveiðileyfi eru tvenns konar:

• Leyfi til að veiða 7 fiska á dag á hvert færi án þess að aflinn reiknist til aflamarks. Aflann má ekki selja eða fénýta á annan hátt. Skila þarf skýrslu mánaðarlega til Fiskistofu um aflabrögð.

• Leyfi sem takmarkast af krókaaflamarki eða aflamarki viðkomandi báts. Þann afla þarf að vigta og skrá við löndun og heimilt er að selja og fénýta aflann. Eingöngu er hægt að fá annaðhvort leyfið innan sama fiskveiðiárs og ekki er heimilt að stunda fiskveiðar í atvinnuskyni innan fiskveiðiársins á sama báti.

Á þessu er þó sú undantekning að Fiskistofu er heimilt að veita leyfi til frístundaveiða sem gilda eingöngu fyrir tímabilið 1. maí til 31. ágúst, en þá er ekki heimilt að stunda veiðar í atvinnuskyni innan þess tímabils.

Hægt er að sækja um, og fá gegn greiðslu að uppfylltum skilyrðum, sérstakar aflaheimildir í þorski til frístundaveiðiskipa. Hér má finna reglugerð um sérstaka úthlutun aflaheimilda til frístundaskipa.