Um Fiskistofu

Fiskistofa var sett á stofn árið 1992. Þá færðust á eina hendi ýmis verkefni sem sjávarútvegsráðuneytið og nokkrar aðrar stofnanir höfðu áður annast. Með því náðist aukin hagræðing og bætt réttaröryggi á þessu svið stjórnsýslunnar. Fiskistofa heyrir undir sjávarútvegs- og landbúnaðarráðherra og framfylgir stefnu íslenskra stjórnvalda varðandi veiðar og nýtingu fiskistofna í sjó og fersku vatni. Fiskistofa hefur eftirlit með fiskveiðum og sér um söfnun, úrvinnslu og dreifingu upplýsinga varðandi veiðar, veiðiheimildir og afla

Verkefni Fiskistofu eru mörg og margvísleg og má þar nefna:

• Útgáfa veiðileyfa og úthlutun aflaheimilda

• Millifærslur aflaheimilda og framfylgd reglna sem um þær gilda

• Söfnun og miðlun upplýsinga um veiðar, afla og vinnslu sjávarafla

• Eftirlit með fiskveiðum

• Eftirlit með vigtun og skráningu sjávarafla

• Rannsókn og eftirfylgni brotamála

• Álagning gjalds vegna ólögmæts sjávarafla

• Utanumhald og eftirlit með réttindum tengdum veiðum ferskvatnsfiska

Af rúmlega sjötíu starfsmönnum Fiskistofu, starfa um þrjátíu við eftirlitsstörf á vettvangi, á sjó og landi. Starfsfólk Fiskistofu býr yfir margvíslegri reynslu, menntun og sérþekkingu á sjávarútvegi. Höfuðstöðvar Fiskistofu eru í Hafnarfirði en starfsstöðvar eru á 6 stöðum á landinu (Vestmannaeyjum, Grindavík, Stykkishólmi, Akureyri, Ísafirði og Höfn í Hornarfirði).