Fréttir

Landaður uppsjávarafli eftir höfnum 2016

24.1.2017

Neskaupstaður ber en eitt árið höfuð og herðar yfir aðrar hafnir landsins þegar horft er til þeirra hafna þar sem mestum uppsjávarafla er landað. Á síðasta ári var landað þar rúmum 163 þúsund tonnum. Hlutur Neskaupstaðar í löndun á síðasta ári er 24,6%. Það er reyndar nokkuð mikill samdráttur milli ára í tonnum en 2015 var landað rúmum 200 þúsund tonnum af uppsjávarafla á Neskaupstað en hlutur hafnarinnar var þá 19,9%.

Sú höfn sem kemur næst er Vestmannaeyjar með tæp 110 þúsund tonn eða 16,6% af heildar uppsjávarafla sem landað var í íslenskar hafnir á síðasta ári.

Landanir á uppsjávarafla undanfarin ár hafa færst í auknum mæli til Austfjarða. Árið 1993 var 42% af öllum uppsjávarafla landað á Austurlandi en hlutfallið hefur síðan vaxið nokkuð jafnt og þétt og í fyrra var hlutfallið komið upp í 70% sem er lítilsháttar aukning frá fyrra ári (sjá mynd). Suðurland er sem áður í öðru sæti með 16,6% af lönduðum afla og kom hann á land nánast eingöngu í Vestmannaeyjahöfn.

Þegar horft er til löndunar á helstu tegundum uppsjávarfisks eftir höfnum þá var mestu landað af loðnu á Neskaupstað eða rúmlega 37 þúsund tonnum, sem eru 29% af allri landaðri loðnu hér á landi. Næst kemur Vestmannaeyjar með tæp 35 þúsund tonn eða 27%.

Neskaupstaður er einnig með stærstan hluta af þeirri síld sem lönduð var hér á landi eða 27,4% (36 þúsund tonn) en Vestmannaeyjar koma næst með 18,5% og Hornafjörður með 11,4%.

Það kemur heldur ekki á óvart að Neskaupstaður trjónir einnig á toppnum þegar horft er til löndunar á makríl en í Neskaupstað var landað 42.647 tonnum í fyrra eða 23,3% af makríl sem lönduð var í íslenskum höfnum. Skammt á eftir koma Vestmannaeyjar með 33.022 tonn (18,0%) og Vopnafjörður með 22.620 tonn (12,4 %).

Erlend skip lönduðu alls 107.165 tonnum af uppsjávarfisk í íslenskum höfnum á síðasta ári. Það sem er fréttnæmt er að Neskaupstaður er ekki helsta löndunarhöfn erlendra uppsjávar-veiðiskipa heldur Fáskrúðsfjörður. Alls lönduðu erlend veiðiskip og þá aðallega norsk loðnuveiðiskip 47.980 tonn á Fáskrúðsfirði en næst kom Neskaupstaður með 16.358 tonn. Þess má geta að Austfirðir eru með 68,9% af hlutdeild landaðs uppsjávarafla erlendra skipa.

 

Nánar má sjá skiptingu á lönduðum uppsjávarafla eftir höfnum hér (bæði magn og hlutfallstölur )

 

 

Til baka Senda grein

Finna skip

Tungumál síðu




banner3
Þetta vefsvæði byggir á Eplica