Fréttir

Verðþróun á aflamarki í þorski

1.12.2015

Undanfarna 12 mánuði hefur verið nokkuð stöðugt verð á aflaheimildum. Verðið á aflamarki í þorski hefur verið í kringum 250 kr/kg en litlu lægra í krókaaflamarki. Í lok september tók verð að lækka lítillega og er í dag 215 kr í aflamarkskerfinu en hefur verið rúmlega 200 kr  í krókaflamarkskerfinu.

Meðfylgjandi línurit sýnir verðþróun í aflamarki og krókaaflamarki í þorski á tímabilinu 1. janúar 2007 til  og með 20. nóvember 2015. Miðað er við hæsta verð hvern dag í viðskiptum með aflamark / krókaaflamark sem flutt er milli óskyldra aðila, þ.e. útgerða með ólíka kennitölu.  Upphæðirnar eru á verðlagi hvers árs. Ath. að ef smellt er á myndina þá kemur hún upp í fullri stærð.

Af verðþróuninni að dæma má ljóst vera að verðfallið sem varð á haustmánuðunum 2012, sem  má rekja til aukins framboðs á þorski á erlendum mörkuðum, hefur ekki gengið til baka nema að litlu leyti en verðið í aflamarkskerfinu fór hæst í upphafi árs 2012 upp í 330 kr.

Stöplaritið sýnir magn sem leigt er á milli skipa óskyldra aðila í báðum kerfum frá árinu 2002. Það ber þó að hafa í huga að gögnin ná á yfirstandandi ári til 20. nóvember sl.  Árið 2002 voru 41.535 tonn leigð á milli skipa í báðum kerfum. Magnið jókst nokkuð til ársins 2005 þegar magnið var rúml. 53 þúsund tonn en dróst þá verulega saman til ársins 2010 þegar magnið fór niður í 18.769 tonn en hefur þá aukist jafnt og þétt og er það sem af er ári orðið 25.661 tonn sem er rúmlega 36% meira magn en 2010 þrátt fyrir að rúmur mánuður lifir enn af árinu.

Hér er hægt að sjá  nánar öll  viðskipti (magn og leiguverð) með aflamark eftir tegundum fyrir tímabil að eigin vali.

Til baka Senda grein

Finna skip

Tungumál síðu




banner6
Þetta vefsvæði byggir á Eplica