Fréttir

Helstu löndunarhafnir í botnfiski 

11.1.2016

Á nýliðnu ári var 87.551 tonni landað í Reykjavíkurhöfn og er hún að venju sú höfn þar sem mestum botnfiskafla er landað. Lítillegur samdráttur var þó milli ára eins og undanfarin ár eða um 241 tonn sem samsvarar 0,3% samdrætti.  Þrátt fyrir þetta ber Reykjavíkurhöfn höfuð og herðar yfir aðrar löndunarhafnir hér á landi þegar horft er til löndunar á botnfiski. Sú höfn sem kemur næst er Grindavíkurhöfn með 46.370 tonn og varð aukning þar um ein 10,9% eða um rúmlega 4,5 þúsund tonn.

Samdráttur var víða um land. Mestur var hann í magni talið á Djúpavogi eða um 6,6 þúsund tonn og mest hlutfallsleg aukning var á Hofsós um 148% eða úr 474 tonnum 2014 í 1.175 tonn 2015.

Lista yfir tíu mestu löndunhafnirnar á síðasta ári má sjá hér hægra megin ásamt því í hvaða sæti þær voru á fyrra ári.

Mest aukning á Norðurlandi vestra

Ef horft er til landsvæða þá jókst landað magn á botnfiskafla mest milli áranna 2014 og 2015 í höfnum á Norðurlandi vestra eða um 15,7% eða úr tæpum 23,4 þúsund tonnum í rúm 27 þúsund tonn. Aukning var í löndun botnfiskafla á öllum landsvæðum að Austurlandi undanskildu en þar dróst hann saman um 9,8% eða um rúm 5,3 þúsund tonn.

Vogar og Reyðarfjörður reka lestina

Ef við beinum athyglinni að þeim löndunarhöfnum þar sem minnstum botnfiskafla var landað á síðasta ári þá eru það Vogar á Reykjanesi og Reyðarfjörður á Austurlandi sem reka lestina. Á síðasta ári var aðeins 6 tonnum landað í Vogum og á Reyðarfirði var 15 tonnum landað en þar dróst landað magn saman um rúm 50% frá árinu þar á undan.  Engum botnfiskafla var landað á Blönduósi og Haukabergsvaðli á nýliðnu ári.

Hlutur Austurlands dregst saman

Hlutfallsleg aukning er á flestum landsvæðum á kostnað hafna á Austurlandi en hlutur Austurlands lækkar úr 11,4% í 10,1%

Hlutur höfuðborgarsvæðisins hefur farið minnkandi undanfarin ár en stóð í stað á síðasta ári í 23,6%. Þess má geta að hlutur höfuðborgarsvæðisins var fyrir tveimur árum 25,7% og fyrir hálfum áratug síðan nam hann 31%.

 

Landaður botnfiskafli eftir höfnum og landsvæðum 2013 til 2015 (Excel)

Til baka Senda grein

Finna skip

Tungumál síðu




banner1
Þetta vefsvæði byggir á Eplica