Fréttir

Uppsjávarafli eftir höfnum 2015

19.2.2016

Neskaupsstaður ber höfuð og herðar yfir aðrar hafnir landsins þegar horft er til þeirra hafna þar sem mestum uppsjávarafla er landað. Á síðasta ári var landað þar rúmum 200 þúsund tonnum. Það er aukning um tæp 21 þúsund tonn eða 11,3% frá fyrra ári. Sú höfn sem kemur næst eru Vestmannaeyjar með tæpt 171 þúsund tonn. Athygli vekur hversu það er mikil aukning frá árinu áður eða um 65 þúsund tonn sem samsvarar 61,3% aukningu. Skýringuna á þessari aukningu má helst rekja til aukningar á aflaheimildum í loðnu á síðasta ári en í Vestmannaeyjum var í fyrra landað 86 þúsund tonnum af loðnu samanborið við 30 þúsund tonn á fyrra ári.

Landanir á uppsjávarafla undanfarin ár hafa færst í auknum mæli til Austfjarða. Árið 1993 var 42% af öllum uppsjávarafla landað á Austurlandi en hlutfallið hefur síðan vaxið nokkuð jafnt og þétt og í fyrra var það  64% sem er lítilsháttar aukning frá fyrra ári (sjá mynd). Suðurland er sem áður í öðru sæti með 17% af lönduðum afla og kom hann á land nánast eingöngu í Vestmannaeyjahöfn. 

Þegar horft er til löndunar á helstu tegundum uppsjávarfisks eftir höfnum þá var mestu landað af loðnu í Vestmannaeyjum eða rúmlega 86 þúsund tonnum, sem eru 19% af allri landaðri loðnu hér á landi. Næst kemur Neskaupsstaður með 73 þúsund tonn eða 16,1%.

Neskaupsstaður er með stærstan hluta af þeirri síld sem lönduð var hér á landi eða 24,6% (29.467 tonn) en Vestmannaeyjar koma næst með 16,6% og Hornafjörður með 14%. Það kemur heldur ekki á óvart að Neskaupstaður trjónir einnig á toppnum þegar horft er til löndunar á makríl en í Neskaupsstað var landað 37.227 tonnum í fyrra eða 20,3% af allri makríl sem lönduð var í íslenskum höfnum. Skammt á eftir koma Vestmannaeyjar með 37.001 tonn (20,2%) og Vopnafjörður með 18.811 tonn (10,2 %).

Erlend skip lönduðu alls 167 þúsund tonn af uppsjávarfisk í íslenskum höfnum á síðasta ári. Það sem er fréttnæmt er að Neskaupsstaður er ekki helsta löndunarhöfn erlendra uppsjávarveiðiskipa heldur Fáskrúðsfjörður. Alls lönduðu erlend veiðiskip og þá aðallega norsk loðnuveiðiskip 56.972 tonn á Fáskrúðsfirði en næst kom Neskaupsstaður með 19.257 tonn. Þess má geta að Austfirðir eru með 60,2% af hlutdeild landaðs uppsjávarafla erlendra skipa.
Til baka Senda grein

Finna skip

Tungumál síðu




banner4
Þetta vefsvæði byggir á Eplica