Fréttir

Aflahlutdeildir stærstu útgerðanna

17.10.2016

Fiskistofa hefur eftirlit með því að yfirráð einstakra aðila yfir aflahlutdeildum fari ekki umfram þau mörk sem lög kveða á um. Í eftirfarandi töflum kemur fram staða aflaheimilda þeirra 100 útgerða sem ráða yfir mestum aflahlutdeildum í upphafi nýs fiskveiðiárs. Sambærilegar upplýsingar koma einnig fram um þær 50 útgerðir sem ráða yfir mestum krókaaflahlutdeildum. Á meðfylgjandi töflum eru hlutdeildir brotnar niður á kennitölur einstakra lögaðila, en ekki sést samtala fyrirtækja sem kynnu að teljast í eigu tengdra aðila skv. 13. gr. laga nr. 116/2006.

Útreikningur á hlut einstakra fyrirtækja í öllum aflahlutdeildum fer fram á grundvelli 3. mgr. 13. gr. laga nr. 116/2006. Úthlutað aflamark fyrirtækis í hverri kvótategund á grundvelli hlutdeilda er reiknað til þorskígilda. Þorskígildin sem þannig eru eignuð hverju fyrirtæki eru síðan lögð saman. Hlutfall þorskígilda sem tilheyra fyrirtæki fæst með því að deila heildartölu úthlutaðra þorskígilda upp í þau þorskígildi sem tilheyra fyrirtækinu. Sú hlutfallstala sýnir hve stórt hlutfall hlutdeildir fyrirtækis eru af öllum hlutdeildum. Útreikningurinn til þorskígilda tekur til allra tegunda annarra en þeirra sem alfarið veiðast utan íslenskrar lögsögu en eru þó kvótabundnar, þ.e. þorskur í Barentshafi og rækja á Flæmingjagrunni eru ekki talin með.

Aflahlutdeild 1. september 2016 - 100 stærstu

Krókaaflahlutdeild 1. september 2016 - 50 stærstu

Litlar breytingar eru á hvaða fyrirtæki eru í efstu sætunum frá því sams konar upplýsingar voru birtar í mars sl. í kjölfar úthlutunar á aflamarki í deilistofnum og viðbótarúthlutunar í loðnu. Eins og undanfarin ár eru HB Grandi og Samherji í tveimur efstu sætunum. HB Grandi er með um 11% af hlutdeildunum en var í mars með 10,8%. Samherji er með 6,2%. Samanlagt ráða þessi tvö stærstu útgerðarfyrirtæki landsins því yfir 17% af hlutdeildunum í kvótakerfinu. Vinnslustöðin í Vestmannaeyjum fellur frá fyrri hluta ársins úr 4. í 6. sæti listans yfir stærstu útgerðarfyrirtækin en annars eru breytingar litlar á toppi listans.

Þegar skoðuð er aflahlutdeild útgerða í krókaaflamarkskerfinu þá er Stakkavík, Grindavík, stærst eins og undanfarin ár, með 4,4% aflahlutdeild. Næst kemur Salting ehf sem staðsett er í Reykjavík með 4,3%.

Samkvæmt lögum um stjórn fiskveiða má heildaraflahlutdeild fiskiskipa í eigu einstakra eða tengdra aðila ekki fara yfir 12% af samanlögðu heildarverðmæti aflahlutdeilda allra tegunda. Þá má aflahlutdeild í þorski ekki fara yfir 12%. Í ýsu, ufsa, grálúðu, steinbít, síld og loðnu má hún ekki fara yfir 20% og í karfa ekki yfir 35%.

Heildarkrókaaflahlutdeild einstakra eða tengdra aðila má ekki fara yfir 5% af samanlögðu heildarverðmæti krókaaflahlutdeilda. Þá má krókaaflahlutdeild fiskiskipa í eigu einstakra eða tengdra aðila ekki fara yfir 4% í þorski og 5% í ýsu.

Þeim sem vilja kynna sér frekar reglur um hámarksaflahlutdeildir er bent á ákvæði 13. og 14. gr. laga um stjórn fiskveiða nr. 116/2006 með síðari breytingum.

Hér má sjá til samanburðar töflur frá mars 2016 yfir þær útgerðir sem þá réðu yfir mestum aflaheimildum:

Aflahlutdeild 3. mars 2016 - 100 stærstu

Krókaaflahlutdeild 3. mars 2016 - 50 stærstu

Til baka Senda grein

Finna skip

Tungumál síðu




banner3
Þetta vefsvæði byggir á Eplica