Fréttir
Stjórnlausar strandveiðar ?
Í „frétt“ sem birtist á vefsíðu Landssambands íslenskra útvegsmanna (LÍÚ) í dag (2. mars 2010) er því haldið fram að stjórnleysi hafi einkennt veiðar strandveiðibáta og að eftirlit með þeim hafi verið jafnmikið og „eftirlit með öllum veiðum íslenska fiskiskipaflotans allan ársins hring“. Í fréttinni er vísað til upplýsinga frá Fiskistofu. Fiskistofa telur því óhjákvæmilegt að taka fram eftirfarandi en leggur jafnframt áherslu á að Fiskistofa mun ekki blanda sér í opinbera umræðu og deilur um kosti og galla strandveiðanna.
Fiskistofa hafði eftirlit með veiðum strandveiðibáta líkt og öðrum fiskveiðum sem Fiskistofu er að lögum falið að hafa eftirlit með. Þetta eftirlit fól vissulega í sér nokkra viðbót við annað fiskveiðieftirlit. Fiskistofa lagði áherslu á að koma á rafrænu eftirliti með strandveiðum þar sem því var við komið og af þeim 6 sértæku skilyrðum sem veiðarnar voru bundnar var rafrænt eftirlit haft með 4, þ.e. veiðum á frídögum, tímalengd veiðiferðar, sjálfvirkum fjareftirlitsbúnaði og leyfilegu aflahámarki á dag. Miðað við fjölda strandveiðibátanna og umfang veiðanna gekk eftirlitið með þeim mjög vel, að mati Fiskistofu og það er fráleitt að halda því fram að það hafi verið jafnmikið verkefni „og eftirlit með öllum veiðum alls íslenska fiskiskipaflotans allan ársins hring“ og að strandveiðarnar hafi búið til „stjórnsýslulegan óskapnað“eins og gert er í umræddri „frétt“ á heimasíðu LÍÚ.
Hvað varðar veiðar umfram sett hámark sem vísað er til í nefndri „frétt“ vill Fiskistofa taka fram að í langflestum tilvikum var um lítið magn að ræða þar sem hlutaðeigandi aðilar áætluðu ekki afla báta sinna fullkomlega réttilega. Nú þegar hefur verið lagt gjald á 224 aðila vegna slíks umframafla, þ.e. í þeim tilvikum þegar aflinn var seldur á fiskmörkuðum. Gjaldið nemur andvirði umframaflans og því hafa hlutaðeigandi aðilar engan fjárhagslegan ávinning af þeim afla. Af þessum 224 aðilum eiga nú 11 aðilar eftir að greiða þá álagningu og nemur fjárhæð eftirstöðva gjaldsins innan við 750.000 krónum..
Fiskistofa vinnur nú að því að leggja á gjald vegna 50 til 70 annarra strandveiðibáta sem lönduðu afla ýmist beint á fiskmarkað eða seldu aflann í beinni sölu. Vinna við þá álagningu hefur farið fram samhliða vinnu við álagningu gjalds vegna veiða umfram aflaheimildir í aflamarks- og krókaaflamarkskerfum og er ekki tímafrekari en almennt gerist við álagningu gjalds vegna umframafla, en í þessum tilvikum þarf að sannreyna sérstaklega upplýsingar um aflamagn og verðmæti með samanburði vigtarupplýsinga og upplýsinga úr vigtar- og ráðstöfunarskýrslum er varða viðskipta með afla.
Vegna þess sem fram kemur í nefndri „frétt“ varðandi beitingu veiðileyfissviptinga vill Fiskistofa að lokum taka fram að þar sem strandveiðarnar stóðu um takmarkaðan tíma reyndist örðugt að beita sviptingu strandveiðileyfis vegna meintra brota er lutu að lengd veiðiferðar og magni í hverri veiðiferð þar sem málsmeðferð samkvæmt kröfum málsmeðferðarreglna stjórnsýslulaga tók lengri tíma en veiðarnar stóðu yfir í hverjum mánuði. Hefur Fiskistofa vakið athygli sjávarútvegs- og landbúnaðarráðuneytisins á þessu með ósk um að til þessa verði litið við setningu reglna komi til þess að strandveiðar með sama eða svipuðu sniði verði heimilaðar síðar.
