Álagning gjalds vegna ólögmæts sjávarafla 2008/2009
Fiskistofa hefur lokið álagningu gjalds vegna ólögmæts sjávarafla íslenskra skipa á fiskveiðiárinu 2008/2009 og er innheimtu nánast lokið.
Í ár bættist við ný tegund af álagningum, sérstök álagning á afla báta sem stunduðu strandveiðar, en þær voru samtals 267 og nam upphæð álagningarinnar 9,9 milljónum.Í hverri veiðiferð á strandveiðum mátti að hámarki veiða 800 kg af kvótabundnum tegundum og var lagt gjald á afla sem var umfram 800 kg í veiðiferð. Þetta skýrir þann fjölda álagninga sem var á strandveiðibáta. Hæsta einstaka álagning hjá strandveiðibát var 390 þúsund krónur. Innheimtuhlutfallið er mjög gott, eða tæp 96% af fjölda og tæp 95% af álagðri upphæð.
Skip í aflamarkskerfunum sem veiddu umfram aflaheimildir voru 68 og heildarupphæð álagninga var tæpar 27 milljónir. Hæsta einstaka álagning hjá aflamarksbát var 3,2 milljónir. Þegar þessi frétt er skrifuð hefur innheimst 45% af heildarupphæð og 76% af heildarfjölda álagninga. Rétt er að geta þess að andmælafrestur í 9 málum vegna einstakra skipa var framlengdur og er greiðsla vegna þeirra því ekki komin á eindaga sem hefur áhrif á innheimtuhlutfall hjá aflamarksskipum.
Gjald vegna ólögmæts sjávarafla er lagt á þau skip sem veiða umfram aflaheimildir sínar, upphæð gjaldsins ræðst af andvirði hins ólögmæta sjávarafla. Á undanförnum árum hefur innheimtuhlutfall þessa gjalds verið nokkuð gott hvað varðar fjölda álagninga en öllu verra sem hlutfall af heildarupphæð eða allt niður í 20%. Gjaldið sem um ræðir er reiknað út og lagt á skip eftir að kvótaárinu lýkur og því geta útgerðir ekki flutt til sín kvóta fyrir þeim afla sem veiddur var umfram aflaheimildir. Bregðist útgerðir ekki við og greiði álagt gjald er skipið svipt veiðileyfi.
Gjaldið, eða sú upphæð sem innheimtist af því, bæði fyrir skip í strandveiði- og aflamarkskerfi rennur til Verkefnasjóðs sjávarútvegsins.
