Nýting aflaheimilda
Nýting aflaheimilda fyrstu níu mánuði fiskveiðiársins 2009/2010 og samanburð við undanfarin ár
Fyrstu níu mánuði fiskveiðiársins hafa íslensk skip veitt 139.945 tonn af þorski sem er 2,6% meiri afli en á sama tíma í fyrra þegar hann var 136.455 tonn. Á sama tímabili hafa íslensk skip veitt 54.539 tonn af ýsu samanborið við 72.124 tonn í fyrra. Þetta samsvarar um 24,8 % minni afla. Íslensk skip hafa nú nýtt 87,3% af aflaheimildum sínum í þorski en á sama tíma í fyrra var nýtingarhlutfallið 80,3%. Nýtingarhlutfallið í ýsu er hins vegar orðið 70,4% á yfirstandandi fiskveiðiári.
Aflamarksskip hafa nýtt 87,6% af heimildum í þorski
Aflamarksskip hafa nýtt 87,6% af aflaheimildum sínum í þorski sem er nokkuð meira en á sama tíma í fyrra þegar þau höfðu nýtt
82,4% af heimildum sínum. Aflamarksskip hafa aðeins fullnýtt aflaheimildir sínar í einni tegund þessa níu fyrstu mánuði fiskveiðiársins en það er í loðnu en eru langt komin með að fullnýta heimidir sínar í nokkrum tegundum, t.a.m. í löngu, skötusel og íslenskri sumargotssíld.
Krókaaflamarksbátar hafa fullnýtt heimildir í flestum kvótategundum
Krókaaflamarksbátar hafa nýtt hærra hlutfall af kvótabundnum tegundum en undanfarin fiskveiðiár. Í þorski er nýtingarhlutfallið nú orðið 84,2% fyrstu níu mánuði fiskveiðiársins. Á sama tíma í fyrra var nýtingarhlutfallið hins vegar aðeins 70,6%. Það sem vekur helst athygli er að krókaaflamarksbátar hafa fullnýtt aflaheimildir sínar í ýsu, löngu keilu og nokkrum öðrum tegundum en hins vegar hafa þeir aðeins nýtt 21,8% af aflaheimildum sínum í ufsa og 69,1% í karfa.
Heildarafli íslenskra skipa dregst saman um 11,6% 
milli fiskveiðiára
Heildarafli íslenska flotans fyrstu níu mánuði fiskveiðiársins er 746.880 tonn. Þetta er nokkuð minni afli en á sama tíma í fyrra er hann var orðinn 844.758 tonn. Botnfiskaflinn er kominn í 388.448 tonn sem er 7,5% minni afli en á sama tíma í fyrra er hann var 419.828 tonn.
Á myndinni hér til hliðar má sjá nýtingarhlutfall síðastliðin þrjú fiskveiðiár, í nokkrum af okkar helstu botnfisktegundum. Um er að ræða nýtingarhlutfall í hvoru fiskveiðistjórnunarkerfinu fyrir sig.
Talsverður samdráttur í uppsjávarafla
Uppsjávaraflinn er nú orðinn 351.841 tonn og samanstendur að mestu af síld sem er 128.951 tonn. Meginuppistaðan í síldaraflanum er norsk-íslensk síld eða 82.929 tonn. Loðnuaflinn er 110.120 tonn og kolmunnaaflinn er 84.658 tonn. Gulldepluaflinn er á yfirstandandi fiskveiðiári 23.909 tonn en var á sama tíma í fyrra 32.951 tonn. Aflinn verður ekki meiri á þessu fiskveiðiári þar sem veiðarnar fara fram yfir vetrarmánuðina. Gulldeplan er ekki kvótabundin en sérstök tilraunaveiðileyfi útgefin af sjávarútvegs- og landbúnaðarráðuneytinu þarf til veiðanna.
Mikil aukning í úthafsrækju
Afli í skel- og krabbadýrum er orðinn talsvert meiri fyrstu níu mánuði fiskveiðiársins en á sama tíma í fyrra. Helst munar um úthafsrækjuafla sem er nú kominn í 4.206 tonn en á sama tíma í fyrra var aflinn einungis 1.796 tonn. Íslensk skip hafa því nýtt 21,0% af aflaheimildum sínum í úthafsrækju. Humarvertíðin byrjaði vel í vor og er aflinn nú orðinn meiri en á sama tíma í fyrra eða 1.355 tonn samanborið við 796 tonn í fyrra. Íslensk skip hafa því nýtt 51% af aflaheimildum í humri samanborið við 33% í fyrra.
Minni undirmálsafli en á sama tíma í fyrra
Á fyrstu níu mánuðum fiskveiðiársins hafa íslensk veiðiskip nýtt 3.204 tonn í verkefnasjóð sjávarútvegsins (vs-afli) samanborið við 3.194 tonn á sama tíma á síðasta fiskveiðiári. Þorskaflinn sem nýttur hefur verið í verkefnasjóðinn er nú 2.686 tonn en var á sama tíma í fyrra 2.990 tonn. Afli í línuívilnun er meiri á yfirstandandi fiskveiðiári en á sama tíma í fyrra. Nú hafa 3.653 tonn verið nýtt til línuívilnunnar en var 3.468 tonn í fyrra. Helst er að merkja breytingar í þorski eða 1.854 tonn samanborið við 1.587 tonn í fyrra.
Minna er landað sem undirmálsafli en á sama tíma í fyrra eða 1.985 tonn samanborið við 2.483 tonn á síðasta fiskveiðiári.
