Afli og nýting aflaheimilda
Afli og nýting aflaheimilda fyrstu ellefu mánuði fiskveiðiársins 2009/2010 og samanburð við undanfarin ár
Þegar einn mánuður er eftir af fiskveiðiárinu hafa íslensk skip veitt 155.717 tonn af þorski þetta er 1,6% minni afli en á sama tíma í fyrra er hann var 158.250 tonn. Á sama tímabili hafa íslensk skip veitt 62.014 tonn af ýsu samanborið við 83.265 tonn í fyrra. Þetta samsvarar um 25,5 % minni afla. Samdráttur hefur einnig verið í ufsa. Ufsa aflinn er orðinn 49.890 tonn en á sama tíma í fyrra var hann 56.390 tonn. Þetta samsvarar rúmlega 11.5% minni afla. Samdráttur er í öllum tegundum kvótabundins botnfisks milli fiskveiðiáranna nema Barentshafsþorsks. Aflinn í Barentshafsþorski er kominn í 10.379 tonn en var á sama tíma í fyrra 6.066 tonn. Lítilsháttar aflaaukning er einnig í úthafskarfa.
Íslensk skip hafa nú nýtt 95,1% af aflaheimildum sínum í þorski en á sama tíma í fyrra var nýtingarhlutfallið 91,9%. Nýtingarhlutfall í ýsu er hins vegar orðið 80,2% á yfirstandandi fiskveiðiári.
Aflamarksskip hafa nýtt 94,8% af heimildum í þorski
Aflamarksskip hafa nýtt 94,8% af aflaheimildum sínum í þorski sem er nokkru meira en á sama tíma í fyrra þegar þau höfðu nýtt 92,5%. Aflamarksskip hafa fullnýtt aflaheimildir sínar í sex tegundum þegar einn mánuður er eftir af fiskveiðiárinu, það er í löngu, keilu, skötusel, íslenskri sumargotssíld og innfjarðarrækju. Skipin eru langt komin með að fullnýta aflaheimildir í öðrum tegundum nema í sandkola og úthafsrækju en aflamarksskip hafa nú nýtt rúmlega 70% af aflamarki í úthafsrækju. Þetta er hærra nýtingarhlutfall en á undanförnum fiskveiðiárum.
Krókaaflamarksbátar hafa fullnýtt heimildir í flestum kvótategundum
Nýtingarhlutfallið er einnig hærra í þorski hjá krókaaflamarksbátum á yfirstandandi fiskveiðiári. Krókaaflmarksbátar hafa nú nýtt 94,3% af heimildum sínum fyrstu ellefu mánuði fiskveiðiársins en á sama tíma í fyrra var hlutfallið hins vegar 88,9%. Krókaaflamarksbátar hafa nú fullnýtt eða eru við það að fullnýta aflaheimildir sínar í öllum tegundum nema karfa og ufsa.
milli fiskveiðiára
Heildarafli íslenskra skipa dregst saman um 8,9% milli fiskveiðiára
Heildarafli íslenska flotans fyrstu ellefu mánuði fiskveiðiársins er 948.918 tonn. Þetta er nokkru minni afli en á sama tíma í fyrra er hann var orðinn 1.133.931 tonn. Botnfiskaflinn er kominn í 454.299 tonn sem er 8,9% minni afli en á sama tíma í fyrra er hann var 498.743 tonn.
Á myndinni hér til hliðar má sjá nýtingarhlutfall síðastliðin þrjú fiskveiðiár, í nokkrum af helstu botnfisktegundunum. Um er að ræða nýtingarhlutfall í hvoru fiskveiðistjórnunarkerfinu fyrir sig.
Samdráttur í makrílafla milli ára
Uppsjávaraflinn er nú orðinn 485.245 tonn og samanstendur að mestu af síld sem er 186.846 tonn. Meginuppistaðan í síldaraflanum er norsk-íslensk síld eða 138.953 tonn. Loðnuaflinn er 110.120 tonn og kolmunnaaflinn er 84.772 tonn. Makrílaflinn er kominn í 79.598 tonn sem er nokkru minni afli en á sama tíma í fyrra er hann var kominn í 104.528 tonn.
Mikil aukning í úthafsrækju
Afli í skel- og krabbadýrum er orðinn talsvert meiri fyrstu ellefu mánuði fiskveiðiársins en á sama tíma í fyrra. Helst munar um úthafsrækjuafla sem er nú kominn í 6.211 tonn en á sama tíma í fyrra var aflinn einungis 3.325 tonn. Íslensk skip hafa því nýtt 70,6% af aflaheimildum sínum í úthafsrækju. Humarvertíðin er langt komin og er aflinn nú orðinn nokkru meiri en á sama tíma í fyrra eða 2.129 tonn samanborið við 1.778 tonn í fyrra. Íslensk skip hafa því nýtt 96,8% af aflaheimildum í humri samanborið við 80,8% í fyrra.
Undirmálsafli dregst saman um rúm 20% milli ára
Á fyrstu ellefu mánuðum fiskveiðiársins hafa íslensk veiðiskip nýtt 4.015 tonn í verkefnasjóð sjávarútvegsins (vs-afli) samanborið við 4.038 tonn á sama tíma á síðasta fiskveiðiári. Þorskaflinn sem nýttur hefur verið í verkefnasjóðinn er nú 3.255 tonn en var á sama tíma í fyrra 3.686 tonn. Afli sem ekki hefur verið skráður til aflamarks hlutaðeigandi fiskiskipa vegna svokallaðrar línuívilnunar er meiri á yfirstandandi fiskveiðiári en á sama tíma í fyrra.
Nú hafa 4.139 tonn verið nýtt til línuívilnunnar en á sama tíma í fyrra voru það 3.886 tonn. Helst er að merkja breytingar í þorski eða 2.068 tonn samanborið við 1.790 tonn í fyrra. Minni afli hefur verið skráður sem undirmálsafli og reiknaður til aflamarks með ívilnandi hætt en á sama tíma í fyrra eða 2.207 tonn samanborið við 2.807 tonn á síðasta fiskveiðiári. Annar afli sem hefur ekki reiknast til aflamarks er 6.853 tonn en mestur hluti hans fékkst við veiðar strandveiðibáta í sumar.
