Rafræn samskipti og auðkenningar
Anna Tryggvadóttir, meistaranemi í lögfræði, hefur unnið fyrir Fiskistofu skýrslu um álitaefni varðandi auðkenningar í þeim margvíslegu rafrænum samskiptum sem Fiskistofa hefur við ýmsa hagsmunaaðila og aðra þá sem til hennar leita . Skýrsluna er hægt að nálgast hér á vef Fiskistofu.
Anna kynnti skýrsluna og niðurstöður greiningarvinnu sinnar í dag fyrir starfsmönnum Fiskistofu og öðrum áhugasömum gestum. Verkefni þetta er liður í þeirri stefnumótunarvinnu í rafrænni og gangsærri stjórnsýslu sem fram hefur farið á Fiskistofu og kynnt var á vef hennar fyrr á þessu ári. Í þeirri vinnu varð fljótlega ljóst að verkefnin sem leysa þarf á þessu sviði væru ekki eingöngu tæknileg heldur jafnframt lagaleg.
Eitt þeirra verkefna sem Fiskistofa ætlar sér að hrinda í framkvæmd á næstu misserum er „rafvæðing“ umsókna og eyðublaða og rafræn málsmeðferð þeirra. Í þeim lögum sem Fiskistofa starfar og þar sem krafa um þessar umsóknir eða skil á eyðublöðum er sett fram er mjög oft krafist undirskriftar þeirra sem hlut eiga að máli. Í skýrslu sinni fer Anna ítarlega yfir lög og reglur sem fjalla um rafræna málsmeðferð, rafrænar undirskriftir og rafrænar auðkenningar. Jafnframt gerir hún grein fyrir hvað felst í hugtökunum „auðkenningarkrafa“ og „auðkenningarþörf“ og hvaða þýðingu þau hafa við „rafvæðingu“ stjórnsýsluverkefna. Anna greinir í skýrslu sinni almennt og með sérstöku tilliti til þeirra verkefna sem Fiskistofa hefur með höndum hver auðkenningarþörf er varðandi einstök verkefni og bendir á hvernig auðkenningarkrafa í lögum er stundum ríkari en raunveruleg auðkenningarþörf.
Fiskistofa kemur til með nýta sér efni úr skýrslu Önnu við ofannefnda rafvæðingu eyðublaða sem og í vinnu við nokkurs konar heimasvæði fyrir útgerðarmenn og aðra hagsmunaaðila sem til stendur að þróa hjá stofnuninni og bjóða upp á. Í stefnumótunarvinnunni var mótuð framtíðarsýn Fiskistofu í rafrænni og gagnsærri stjórnsýslu og er hún svohljóðandi:
„Fiskistofa ætlar að vera fyrirmynd fiskveiðistjórnunarstofnana hvarvetna í heiminum í nýtingu upplýsingatækni í þjónustu og samskiptum við hagsmunaaðila og almenning og vera í hópi 5 framsæknustu stjórnsýslustofnana á Íslandi í rafrænni og gagnsærri stjórnsýslu.”
Með þetta að leiðarljósi var þess farið á leit við Önnu að skýrslan yrði að einhverju leyti almenns eðlis þannig að hún mætti að einhverju leyti einnig nýtast öðrum stofnunum við sambærilega vinnu. Með birtingu skýrslunnar á þennan hátt er það von Fiskistofu að hún komi sem flestum að notum.
Skýrsluna má finna hér: Lagaleg álitaefni um auðkenningu í rafrænum samskiptum við Fiskistofu.
