Hlutverk og megingildi Fiskistofu

Ábyrg nýting auðlinda

Fiskistofa er sjálfstæð stjórnsýslustofnun sem heyrir undir sjávarútvegs- og landbúnaðarráðherra og gegnir mikilvægu hlutverki við að stuðla að ábyrgri og hagkvæmri nýtingu fiskistofna og hvala.

Stjórnun og eftirlit / Söfnun og úrvinnsla upplýsinga

Lykilþættir í ábyrgri nýtingu auðlinda eru styrk stjórnun og virkt eftirlit. Hlutverk Fiskistofu er að annast framkvæmd laga og reglna um stjórn fiskveiða í sjó og fersku vatni. Jafnframt er hlutverk Fiskistofu að annast stjórnsýslu og eftirlit á sviði fiskeldis, ásamt söfnun, úrvinnslu og útgáfu upplýsinga varðandi sjávarútveg, fiskeldi, lax- og silungsveiðar og hvalveiðar.

Staðfesta

Fiskistofa leitast ávallt við að rækja stjórnunar- og eftirlitshlutverk sitt þannig að staðfesta sé í túlkun leikreglna sem er á hennar sviði að framfylgja og að tryggt sé að eftir þeim sé farið.

Framþróun

Fiskistofa leggur sitt af mörkum og er virkur þátttakandi í því að þróa markvissa og hagkvæma stjórn á nýtingu lifandi auðlinda í sjó og fersku vatni og stuðla þannig að því að Íslendingar séu og verði ávallt í fremstu röð á því sviði.

Skýr og lifandi markmið

Fiskistofa setur sér skýr markmið um verklag og gæði í starfsemi sinni og fylgist með skipulegum hætti með framgangi þeirra.

Aðbúnaður

Fiskistofa leitast við að bjóða starfsfólki sínu upp á gott vinnuumhverfi og góðan aðbúnað og tæki.

Viðmót

Allir þeir sem Fiskistofa hefur samskipti við eiga að fá viðmót sem einkennist af sanngirni, háttvísi og fagmennsku.

Gott starfsfólk

Starfsgleði, vellíðan, gagnkvæm virðing, tillitssemi og jafnrétti, hæfni, þekking, vinnusemi, skipulag, vandvirkni og háttvísi eru megingildi sem höfð eru í heiðri á Fiskistofu og hjá starfsfólki hennar.