Siðareglur
Siðareglur
Viðmið fyrir góða starfshætti ríkisstarfsmanna
Siðareglur Fiskistofu
Siðareglur þessar taka til allra starfsmanna Fiskistofu og skulu þeir ávallt hafa reglurnar að leiðarljósi. Siðareglurnar koma til viðbótar settum reglum í lögum um réttindi og skyldur starfsmanna ríkisins, stjórnsýslulögum og öðrum lögum og reglum sem gilda um starfsmenn og starfsemi Fiskistofu. Starfsmaður skal vísa álita- og ágreiningsmálum varðandi túlkun eða beitingu siðareglnanna til ákvörðunar yfirmanns síns. Starfsmaður getur skotið ákvörðun yfirmanns til úrskurðar fiskistofustjóra.
Meginreglur
Starfsmanni ber að rækja starf sitt af alúð og samviskusemi. Hann skal vera réttsýnn og sanngjarn í störfum sínum og koma fram af kurteisi og lipurð og forðast að hafast nokkuð það að í starfi sínu eða utan þess sem er honum til vanvirðu eða álitshnekkis og varpað getur rýrð á starf hans eða Fiskistofu.
Starfsmaður skal sýna samstarfsfólki sínu á Fiskistofu virðingu, tillitssemi og hjálpfýsi og leggja sitt af mörkum til eflingar og varðveislu árangursríks samstarfs og góðs starfsanda.
Starfsmaður skal vera snyrtilega klæddur við vinnu sína. Hann skal ganga vel um á Fiskistofu og fara vel með þær eigur stofnunarinnar sem hann hefur til umráða og er trúað fyrir.
Trúnaður
Starfsmaður skal gæta trúnaðar og þagmælsku um atriði er hann fær vitneskju um í starfi sínu og leynt eiga að fara samkvæmt ákvæðum laga, fyrirmælum stjórnenda eða eðli máls. Þetta á við hvort sem um er að ræða atriði sem varða aðila sem Fiskistofa hefur samskipti við eða hefur afskipti af, stofnunina sjálfa eða starfsmenn hennar.
Hagsmunatengsl
Starfsmanni er óheimilt að gegna eða taka við öðru launuðu starfi samhliða starfi sínu hjá Fiskistofu, hefja atvinnurekstur eða setjast í stjórn fyrirtækis, án vitundar og samþykkis yfirmanns síns. Ef yfirmaður telur að starf, atvinnurekstur eða stjórnarseta kunni að vera ósamrýmanleg starfi hlutaðeigandi starfsmanns hjá Fiskistofu skal hann vísa málinu til úrskurðar fiskistofustjóra.
Starfsmaður skal ekki taka þátt í umfjöllun eða afgreiðslu mála sem varða hann sjálfan eða venslafólk hans. Þá skal starfsmaður ekki fjalla um eða afgreiða mál ef hann eða fjölskylda hans, nánasta tengdafólk eða nánir vinir eiga í fyrirtæki sem mál varðar eða hafa verulega hagsmuni af afgreiðslu þess beint eða óbent. Minniháttar hlutafjáreign í almenningshlutafélagi telst ekki eignaraðild í þessu sambandi. Þá skal starfsmaður forðast að fjalla um eða afgreiða mál ef hann tengist stjórnendum hlutaðeigandi fyrirtækis verulega eða fyrir hendi eru aðrar þær aðstæður sem til þess eru fallnar að draga megi óhlutdrægni starfsmannsins í efa með réttu. Starfsmaður skal gera yfirmanni sínum grein fyrir ef framangreindum aðstæðum er til að dreifa og skal álitamálum sem rísa í þessu sambandi vísað til úrskurðar fiskistofustjóra.
Starfsmaður má alls ekki þiggja greiða, þjónustu eða gjafir (s.s. fisk í soðið, málsverði, áfengi eða aðrar tækifærisgjafir), boðsferðir eða önnur verðmæti eða hlunnindi af aðilum sem Fiskistofa hefur einhvers konar eftirlit með eða veitir þjónustu af einhverju tagi eða hefur með einhverjum hætti samskipti við eða afskipti af, nema um sé að ræða óveruleg verðmæti eða hagsmuni og þá ávallt að höfðu samráði við fiskistofustjóra. Ef starfsmönnum eru sendar slíkar gjafir án samþykkis þeirra skulu þeir greina forstöðumanni viðkomandi sviðs frá því og koma gjöfinni í hans hendur og skal hann í samráði við fiskistofustjóra ákveða hvernig brugðist skal við af hálfu Fiskistofu.
Samskipti starfsfólks Fiskistofu við utanaðkomandi aðila
Fiskistofa leggur áherslu á að starfsfólk hennar eigi góð samskipti við alla aðila. Starfsfólk skal sýna háttvísi og sanngirni og leysa fljótt og vel úr öllum erindum sem berast til starfsfólks stofnunarinnar. Erindi sem borin eru upp við starfmann, hvort heldur það er í símtali eða munnlega á vettvangi, og falla ekki beint undir starfssvið starfsmannsins ber að vísa til þess starfsmanns Fiskistofu sem um slík mál fjallar. Ef um flóknar eða stórar fyrirspurnir er að ræða er rétt að óska eftir skriflegri fyrirspurn. Starfsfólk Fiskistofu getur að sjálfsögu ávallt leitað svara hjá viðkomandi samstarfsmanni og að því loknu eftir atvikum miðlað svarinu til fyrirspyrjanda.
Í samskiptum sem starfsmaður hefur við utanaðkomandi aðila þegar hann er í starfi fyrir Fiskistofu (þ.e. á vinnutíma) er mikilvægt að hann hafi eftirfarandi í huga:
a) Varast ber að dragast inn í umræður á pólitískum nótum um fiskveiðistjórnunarkerfið eða stefnu hlutaðeigandi stjórnvalda. Fiskistofa er stjórnsýslu- og eftirlitsstofnun sem ber að sjá um að farið sé að reglum, en það er ekki hlutverk Fiskistofu að ákveða hvaða kerfi eru höfð við stjórnun fiskveiða. Alþingi setur lög um það og ráðherra útfærir með reglugerðum og stefnumótun innan þess ramma sem lögin setja. Sama á við um samningsbundin réttindi og skyldur útgerðarmanna og sjómanna, fiskverð o.þ.h.
b) Afar mikilvægt er að starfsfólk sýni fyllsta trúnað og þagmælsku varðandi einstök mál sem eru og hafa verið á borðum Fiskistofu eða til meðhöndlunar þar með beinum eða óbeinum hætti. Þetta er ávallt mikilvægt en þó sérstaklega þegar um brotamál og/eða viðurlagaákvarðanir, s.s. sviptingar leyfa eða álagningar gjalda eða kærur til lögreglu eða annarra eftirlitsstjórnvalda, er að ræða. Þetta á að sjálfsögðu sérstaklega við samtöl og samskipti við utanaðkomandi aðila en eftir atvikum einnig í samtölum við annað starfsfólk Fiskistofu sem ekki tekur beinan þátt í meðferð slíkra mála.
Ábendingar um ótilhlýðilega háttsemi
Samkvæmt dreifibréfi 1/2006 skal ríkisstarfsmaður sem verður var við spillingu, ólögmæta eða ótilhlýðilega háttsemi, koma upplýsingum um slíka háttsemi til réttra aðila. Til réttra aðila geta m.a. talist stjórnendur stofnunar, hlutaðeigandi fagráðuneyti og eftir atvikum Ríkisendurskoðun, umboðsmaður Alþingis eða lögregla. Verði starfsmaður Fiskistofu var við einhverja þá háttsemi innan stofnunarinnar sem hann telur vera spillingu af einhverju tagi skal hann taka málið upp við starfsmannastjóra eða fiskistofustjóra. Fyllsta trúnaðar verður gætt. Varði málið fiskistofustjóra eða ef starfsmaður telur sér af einhverjum ástæðum ekki fært að taka málið upp við hann eða er ósáttur við hvernig fiskistofustjóri tekur á máli sem hann hefur til hans beint getur starfsmaður farið með mál til ráðuneytisstjóra í sjávarútvegs- og landbúnaðarráðuneyti eða eftir atvikum til Ríkisendurskoðunar, umboðsmanns Alþingis eða lögreglu.
Starfsmaður sem í góðri trú greinir með ofangreindum hætti frá spillingu eða óeðlilegri háttsemi sem hann verður áskynja innan Fiskistofu skal á á engan hátt gjalda þess.
