Jafnréttisstefna

Fiskistofa kappkostar að fara í hvívetna að ákvæðum laga nr. 10/2008 um jafna stöðu og jafnan rétt kvenna og karla og öðrum lögum og reglum sem þýðingu hafa hvað varðar jafnrétti og jafnræði.

Helstu stefnumið Fiskistofu í jafnréttismálum eru:

Að mismuna ekki á grundvelli kynferðis við ráðningar í störf.
Að mismuna ekki á grundvelli kynferðis við ákvarðanir launa og annarra starfstengdra kjara.
Að mismuna ekki á grundvelli kynferðis við mat á fræðsluþörf og símenntun.
Að stuðla að jafnvægi í hlutföllum kynja í stjórnunarstörfum, nefndum og starfshópum og almennum störfum eftir því sem aðstæður leyfa.
Að gera starfsmönnum kleift að samræma starfsskyldur sínar og fjölskyldulíf eins og kostur er.
Að bjóða upp á sveigjanlegan vinnutíma eftir því sem við verður komið miðað við eðli starfs hverju sinni.
Að tryggja starfsmönnum vinnuumhverfi þar sem mismunun byggð á kynferði er ekki til staðar og kynferðisleg áreitni eða annars konar ofbeldi er ekki liðið.
Að mismuna starfsmönnum ekki á nokkurn hátt á grundvelli kynferðis, fötlunar, trúarbragða, þjóðernis, kynþáttar, litarháttar, stjórnmálaskoðana, kynhneigðar eða annarra persónubundinna atriða.

Markmið

Markmið jafnréttisstefnu Fiskistofu er að tryggja fyllsta jafnræðis á milli kvenna og karla auk þess að stuðla að því að allir starfsmenn njóti virðingar innan stofnunarinnar og fái notið sín í starfi á jafnréttisgrundvelli án tillits til kynferðis, fötlunar, þjóðernis, kynþáttar, litarháttar, stjórnmálaskoðana, kynhneigðar eða annarra persónubundinna atriða. Sérhverjum starfsmanni ber að framfylgja jafnréttisstefnunni, meðal annars með því að koma fram við samstarfsmenn, starfsumsækjendur og viðskiptavini af sanngirni og óhlutdrægni og í fyllsta samræmi við jafnréttisstefnu þessa.

Ráðningar og auglýsingar

Starfsauglýsing skal að öllu jöfnu höfða til umsækjenda af báðum kynjum. Heimilt er að hvetja annað kynið sérstaklega til að sækja um auglýst starf ef tilgangurinn er að jafna hlut kynjanna innan ákveðins starfshóps.

Ávallt skal þess gætt að umsækjandi sem metinn er hæfastur til að gegna starfi sé ráðinn án tillits til kynferðis, fötlunar, þjóðernis, kynþáttar, litarháttar, stjórnmálaskoðana, kynhneigðar eða annarra persónubundinna atriða.

Kjör starfsmanna

Við ákvörðun launa og annarra starfskjara skal þess gætt að kynjum sé ekki mismunað. Konur og karlar skulu njóta sömu kjara fyrir jafnverðmæt og sambærileg störf. Einnig skulu kynin njóta sömu kjara hvað varðar lífeyris-, orlofs- og veikindarétt og hvers konar önnur starfskjör eða réttindi.

Jafnræðis skal gætt við úthlutun verkefna, tilfærslur í störfum, veitingu tækifæra til að axla ábyrgð og ákvarðana varðandi framgang í störfum og uppsagnir.

Starfsþjálfun og endurmenntun

Konur og karlar skulu njóta sömu möguleika og hvatningar til endurmenntunar, starfsþjálfunar og til að sækja námskeið í því skyni að auka hæfni sína í starfi eða til að viðhalda menntun sinni.

Stjórn og skipulag

Gefa skal báðum kynjum jöfn tækifæri til þátttöku í stjórnun og stefnumótun Fiskistofu eftir því sem frekast er unnt. Tryggja skal að bæði kynin njóti sömu möguleika á að starfa í nefndum og hópum sem settir eru upp innan Fiskistofu eða Fiskistofa tilnefnir í. Jafnframt skal þess gætt að bæði kynin fái tækifæri til að axla ábyrgð og koma að ákvarðanatöku hjá stofnuninni.

Samræming vinnu og einkalífs

Starfsfólki skal, að svo miklu leyti sem það er unnt, gefinn kostur á að samræma starfsskyldur sínar og skyldur gagnvart fjölskyldu með gangkvæmum sveigjanleika í vinnutíma, hlutastörfum eða annarri vinnuhagræðingu. Réttindi skulu ekki vera kynbundin, t.d. varðandi foreldraorlof og veikindi barna. Það telst þó ekki mismunun í þessu sambandi að taka sérstakt tillit til kvenna vegna þungunar og barnsburðar.

Starfsaðstaða og líðan starfsmanna

Fiskistofa býður upp á gott starfsumhverfi og skapar starfsmönnum tækifæri til að eflast og þróast í starfi. Allir starfsmenn eiga rétt á því að komið sé fram við þá af virðingu og heiðarleika.

Kynferðisleg áreitni og einelti

Einelti og kynferðisleg áreitni verður alls ekki látin viðgangast á Fiskistofu. Þeir starfsmenn sem verða fyrir einelti eða kynferðislegri áreitni eða vita til þess að aðrir starfsmenn verði eða hafi orðið fyrir slíku skulu leita til starfsmannastjóra, fiskistofustjóra eða trúnaðarmanna. Með slík mál skal farið samkvæmt sérstökum verklagsreglum sem stofnunin hefur sett og kynnt fyrir starfsfólki. Kynferðisleg áreitni, einelti eða annað ofbeldi varðar áminningu eða brottrekstur úr starfi.