Upplýsingastefna Fiskistofu

Meginstefna

Stefna Fiskistofu er að miðlun upplýsinga sé greið og aðgengi að þeim öruggt og hagkvæmt. Stuðla skal að því með þeim aðferðum sem tiltækar eru og heimilar m.t.t. ákvæða laga um stjórn fiskveiða, umgengnislaga, upplýsingalaga, stjórnsýslulaga, laga og reglna á sviði persónuverndar sem og laga og reglna um trúnaðar- og þagnarskyldu starfsmanna ríkisins. Fiskistofa mun leitast við að tryggja að upplýsingar sem eftir er leitað séu veittar skjótt og örugglega með þeim skilyrðum og/eða fyrirvörum sem kann að leiða af ákvæðum fyrrgreindra laga.

Skipuleg birting upplýsinga

Notast ber við vefsíðuna www.fiskistofa.is við veitingu upplýsinga eins og hægt er og hún endurbætt og þróuð eins og efni standa til. Óski aðili eftir sérstökum upplýsingum sem ekki er hægt að nálgast á síðunni skal leitast eftir því að bæta vefsíðuna með það fyrir augum að umbeðnar upplýsingar verði gerðar aðgengilegar þar svo skjótt sem auðið er, enda sé um að ræða upplýsingar sem heimilt er að láta í té. Með vísan til ofangreinds skal reynt að komast hjá því að vinna reglulega sértækar upplýsingar fyrir aðila utan Fiskistofu.

Á grundvelli upplýsingalaga nr. 50/1996 er heimilt að veita upplýsingar varðandi fyrirtæki/félög, þar á meðal um skip þeirra, aflaheimildir og afla. Í 5. gr. laganna segir, að stjórnvöldum sé óheimilt að veita almenningi aðgang að gögnum um einka- og fjárhagsmálefni fyrirtækja og annarra aðila sem sanngjarnt og eðlilegt að leynt fari nema sá samþykki sem í hlut á. Með hliðsjón af ákvæðum laga um stjórn fiskveiða  þar sem m.a. er kveðið á um að nytjastofnar séu sameign þjóðarinnar og sett tiltekið hámark hvað varðar yfirráð einstakra aðila yfir aflahlutdeildum, telur Fiskistofa rétt og skylt að veita aðgang að upplýsingum um aflahlutdeild og aflamark lögaðila. Fiskistofa gefur ekki út lista eða skrár úr aðilaskrám sínum með upplýsingum um einstaklinga eða lögaðila.

Ekki er heimilt að taka saman og afhenda upplýsingar eftir einstaklingum, þ.e.a.s. þannig að með kennitölu einstaklings eða nafni séu teknar saman upplýsingar um skip, afla og/eða aflaheimildir sem skráðar eru á skip í hans eigu eða útgerð.

Fiskistofa veitir ekki utanaðkomandi aðilum beinan aðgang að upplýsingum í gagnagrunnum sínum. Aðeins skattayfirvöld, Hagstofa og aðrir þeir aðilar sem sérstaka heimild hafa í lögum til að sækja upplýsingar til Fiskistofu eru undanþegnir reglum sem hér er fjallað um. Ennfremur lætur Fiskistofa upplýsingarnar af hendi til þeirra sem veittu stofnuninni þær. T.a.m. á eigandi vinnslufyrirtækis rétt á að fá upplýsingar um magn og verðmæti keypts afla eigin fyrirtækis.

Svörun fyrirspurna

Almennt skal vísa fyrirspurnum um starfsemi Fiskistofu og beiðnum um upplýsingar sem sækja þarf í gagnagrunna stofnunarinnar til upplýsingasviðs. Upplýsingasvið leitar til þeirra starfsmanna eftir upplýsingum sem við á hverju sinn við svörun fyrirspurna og gætir þess þannig að jafnræðis sé gætt við fyrirspurnarsvörun á Fiskistofu og að vinna við svörun fyrirspurna sé í samræmi við upplýsingastefnuna.

Sé um að ræða fyrirspurnir sem viðkomandi starfsmaður hefur svar við á reiðum höndum og varða skilgreind verkefni hans er honum þó heimilt að svara fyrirspurninni beint. Ávallt skal reynt að beina fyrirspyrjanda inn á vefsíðu Fiskistofu, sé svarið aðgengilegt þar.

Fyrirspurnum eða viðtalsbeiðnum frá fjölmiðlum skal alltaf beint til forstöðumanns þess sviðs sem málefnið heyrir undir eða til fiskistofustjóra ef spurt er um stefnu Fiskistofu eða starfsemina almennt. Forstöðumenn eða fiskistofustjóri ákveða hvort þeir svara sjálfir eða feli það öðrum. Sama á við ef erindi eða fyrirspurn varðar viðkvæm mál, s.s. viðurlög sem ákveðin hafa verið eða brotamál eða meint brotamál sem eru eða hafa verið til meðferðar hjá Fiksistofu.  Alitamálum skal vísa til upplýsingateymis til umfjöllunar.

Sé óskað eftir afriti af bréfum eða öðrum gögnum úr skjalasafni Fiskistofu skal vísa erindi þar um til forstöðumanns viðkomandi sviðs til afgreiðslu. Álitamálum skal vísa til forstöðumanns upplýsingasviðs.

Útgefið efni (reglubundnar skráningar)

Fiskistofa gefur mánaðarlega út bráðabirgðatölur fyrir mánuði, ár og fiskveiðiár á vefsíðum sínum og á skýrsluformi. Þá koma Aflatölur Fiskistofu út í prentuðu bandi ca. mánuði eftir lok hvers fiskveiðiárs. Starfsskýrsla Fiskistofu kemur út í febrúar ár hvert vegna starfsemi ársins á undan. Aðrar útgáfur eru sértækar.

Skjal þetta er samið og útbúið af upplýsingateymi Fiskistofu. Teymið ber ábyrgð á stefnu þeirri sem hér er mörkuð og mun vinna samkvæmt henni. Jafnframt mun teymið stuðla að því að farið verði með upplýsingamál samkvæmt því sem fram kemur í stefnunni.

Fiskistofa Maí 2007