Um fiskveiðistjórnunarsvið

Fiskveiðistjórnunarsvið annast útgáfu veiðileyfa, úthlutun aflaheimilda til íslenskra skipa og erlendra skipa í íslenskri lögsögu og íslenskra skipa í erlendum lögsögum. Sviðið fylgist með aflaheimildastöðu fiskiskipa og staðfestir flutning aflaheimilda milli fiskiskipa.

Fiskveiðistjórnunarsvið gefur út rekstrarleyfi til fiskeldis, heldur utan um rafræna framleiðsludagbók varðandi eldið og út hlutar aflaheimildum til skipa sem veiða fisk í áframeldi og þá hafa starfsmenn sviðsins eftirlit með föngun, vigtun og skráningu á þorski til áframeldis. Fiskveiðistjórnunarsvið hefur eftirlit með veiðum íslenskra og erlendra skipa í íslenskri lögsögu og veiðum íslenskra skipa utan lögsögunnar. Helstu verkefni sviðsins hvað varðar veiðieftirlit eru að fylgjast með veiðarfærum og búnaði fiskiskipa, gildi veiðileyfa og færslu afladagbóka. Auk þess hafa veiðieftirlitsmenn eftirlit með tegunda- og stærðarsamsetningu afla og gera tillögur um lokanir veiðisvæða með það að markmiði að vernda smáfisk og koma í veg fyrir skaðlegar veiðar. Þá er einnig haft eftirlit með veiðum, vinnslu og nýtingu um borð í vinnsluskipum.

Fiskveiðistjórnunarsvið veitir fiskvinnslustöðvum og fiskmörkuðum leyf til endurvigtunar sjávarafla m.t.t. fiskveiðistjórnunar og hefur eftirlit með að afli sé réttilega veginn og skráður og á margvísileg samskipti og samstarf við löndunarhafnir og vigtunarleyfishafa varðandi vigtun og skráningu afla. Auk þessa sinnir sviðið eftirliti með útflutningi óunnins afla í gámum og með fiskiskipum og eftirliti með fiskflutningum innanlands. Fiskveiðistjórnunarsvið hefur einnig eftirlit með veiðum á hrefnu og langreyði, safnar upplýsingum um veidd dýr og er umsagnaraðili varðandi veitingu leyfa til hrefnu- og hvalveiða.

Sviðið rannsakar brotamál og undirbýr og tekur eftir atvikum ákvarðanir varðandi beitingu stjórnsýsluviðurlaga og/eða kærur til lögreglu og á í margvíslegum samskiptum við lögregluembætti vegna slíkra mála. Þá hefur svið samskipti og samstarf við Landhelgisgæsluna og Hafrannsóknastofnun sem og við erlend fiskveiðistjórnvöld og fjölþjóðlegar stofnanir á því sviði, s.s. NEAFC og NAFO.

Forstöðumaður er Eyþór Björnsson