Útflutningur

Íslenskum fiskiskipum er heimilt að flytja út óunninn afla til endanlegrar vigtunar og sölu á erlendum fiskmarkaði. Hafi aflinn ekki verið endanlega vigtaður á Íslandi þarf markaðurinn sem um ræðir að hafa sérstakt leyfi Fiskistofu til þess að framkvæma endanlega vigtun. Markaðir með slík leyfi eru í Grimsby á Bretlandi, í Tóftum í Færeyjum og í Bremerhaven í Þýskalandi.

Sé afli fluttur óunninn á fiskmarkaði erlendis þarf skipstjóri, þegar um er að ræða óvigtaðan afla, eða útflytjandi, þegar um er að ræða fullvigtaðan afla, að tryggja að útflutningur aflans sé tilkynntur til Fiskistofu með a.m.k. 24 klukkustunda fyrirvara. Það er hægt að gera rafrænt á vef Fiskistofu.

Afla, sem fluttur er út til endanlegrar vigtunar erlendis, er skylt að bjóða upp á opnum íslenskum uppboðsvef fiskmarkaða  áður en hann er fluttur úr landi. Það uppboð fer fram á svokölluðu Fjölneti fiskmarkaðanna. Útgerðarmaður þarf að hafa samband við þann markað sem að hann vill að aflinn verði boðinn upp á og gefa m.a. upp nákvæma uppboðslýsingu á aflanum og það lágmarksverð sem óskað er fyrir hann.

Þegar að óunninn afli hefur verið seldur á erlendum uppboðsmarkaði fær Fiskistofa sendar upplýsingar um það magn sem selt hefur verið og söluverðmætið og birtir á vefnum.

Sömu reglur gilda um afla sem fiskiskip sigla með sjálf til vigtunar og sölu á erlendum fiskmörkuðum.