Ný reglugerð um hrognkelsaveiðar
Sjávarútvegs og landbúnaðarráðuneytið hefur gefið út nýja reglugerð nr.
165/2012, um hrognkelsaveiðar.
Helstu breytingar frá fyrri reglugerð um sama efni eru :
- að leyfileg veiðitímabil eru nú mismunandi fyrir einstök veiðisvæði.
- að hrognkelsaafli skuli vera meirihluti afla í einstökum löndunum,
miðað við þorskígildi. Verði hrognkelsaafli ítrekað minni hluti afla
er Fiskistofu heimilt að svipta skip leyfi til hrognkelsaveiða.
- að nú er, til viðbótar lágmarksstærðar, sett hámark á möskvastærð í
grásleppunetum.
- að óheimilt er að hefja veiðar með yfirtöku hrognkelsaneta í sjó.
Merking veiðarfæra skal að fullu frágengin í landi áður en veiðar með
hrognkelsanetum hefjast.
Þá vill Fiskistofa vekja athygli skipstjóra á reglum um númeramerkingar og
drátt grásleppuneta.
Samkvæmt gildandi reglugerð um hrognkelsaveiðar er skylt að númera
netatrossur sem hver bátur á í sjó frá einum til þess fjölda trossa, sem
hann á í sjó. Brot á þessu varða áminningu eða sviptingu veiðileyfis.
Einnig er minnt á að grásleppunet skulu dregin eigi síðar en 6 sólarhringum
eftir að þau eru lögð í sjó. Frá þessu má aðeins víkja ef veður hamlar
sjósókn með þeim hætti að ekki reynist unnt að vitja neta. Vakinn er
athygli á því að samkvæmt reglugerðinni skal skipstjóri tilkynna Fiskistofu
um það ef grásleppunet liggja lengur en 8 sólarhringa án þess að hafa verið
dregin. Hægt er að tilkynna um þetta í síma Fiskistofu, eða á
„Ábending/fyrirspurn“ hnappinn hér á heimasíðu Fiskistofu. Brot varða
áminningu eða sviptingu veiðileyfis.
