Fréttir

Grásleppuvertíðin: afli og meðafli

18.5.2020

Fiskistofa hefur tekið saman yfirlit yfir afla og meðafla grásleppubáta á vertíðinni sem stóð frá 10. mars og fékk óvæntan endi 2. maí í tilefni af endurmati Hafrannsóknarstofnunar á stöðu stofnsins og aflabrögðum. Margar útgerðir gátu því ekki stundað veiðarnar í þá 44 daga sem heimilaðir höfðu verið. Þess skal getið að bátar í Breiðafirðinum sem vanalega byrja um eða eftir 20. maí fá leyfi til veiða í 15 daga frá 20. maí eða síðar á þessu ári.

Það voru 163 grásleppubátar sem lönduðu um 5.290 tonnum í heildina á þessu tímabili nú í vor. Heildarafli í grásleppu var tæplega 4.685 tonn og meðafli var því um 605 tonn.

Það er afar mikilvægt að skrá allan meðafla á veiðunum bæði í fiski sem og sel og sjófuglum. Nákvæm skráning á öllum meðafla er forsenda þess að hægt sé að sýna fram á það gagnvart vottunaraðilum og stjórnvöldum þeirra ríkja þar sem aflinn er fluttur inn að staðgóð þekking og vísindalegar rannsóknir liggi að baki veiðunum og þeim reglum sem um þær gilda.

Hér fylgja margvíslegar upplýsingar um veiðarnar í mars og apríl (klikka á myndirnar til að stækka):

Afli eftir löndunarhöfnum, fjöldi báta og landana og hlutfall meðafla

Myndin sýnir að hafnir með flesta báta, landanir og afla voru Bakkafjörður, Ólafsfjörður og Siglufjörður. Hæst hlutfall meðafla var á Ársskógssandi, Ólafsvík og Dalvík. Nokkrar hafnir eru ekki með neinn skráðan meðafla en þær eru Djúpivogur, Eskifjörður, Hvammstangi, Neskaupstaður og Norðurfjörður.

Tuttugu aflahæstu grásleppubátarnir og hlutfall meðafla

Athygli vekur að aflahæstu bátarnir í grásleppu eru ekki aflahæstir þegar tekið er mið af meðaflanum eins og gert er á myndinni hér að ofan.

Grásleppubátarnir með hæsta og lægsta hlutfall meðafla á vertíðinni

Ástæður breytilegs hlutfalls meðafla geta verið margvíslegar. Það er hlutverk Fiskistofu að hafa eftirlit með að skráning og vigtun á sjávarafla sé sem réttust. Til þess að rækja það hlutverk sem best beitir Fiskistofa margvíslegum aðferðum og má í því sambandi nefna fræðslu og samvinnu við útgerðir og vinnslur, áhættugreiningu og aðgengi allra að upplýsingum um veiðar og afla.

Eins og að ofan er getið er það afar mikilvægt að skrá allan meðafla á veiðunum bæði í fiski sem og sel og sjófuglum til þess að viðhalda viðurkenningu umheimsins á því að veiðarnar séu ábygar og í anda sjálfbærrar þróunar. En það er einmitt hlutverk Fiskistofu að gæta hagsmuna þjóðarinnar að þessu leyti.