Tilkynningar

Skipti á aflamarki í loðnu– viðbót

19.2.2021


Með reglugerð nr. 119/2021, um breytingu á reglugerð nr. 60/2021 um loðnuveiðar íslenskra skipa á vetrarvertíð 2021 var leyfilegur heildarafli í loðnu aukinn um tæplega 50.000 tonn. Ekki var tekið tillit til þeirrar aukningar í tilboðsmarkaði febrúarmánaðar og í ljósi þess að yfirstandandi loðnuvertíð fer að ljúka er nauðsynlegt að bjóða þær heimildir út svo þær nýtist. Ráðherra hefur undirritað reglugerð sem mun birtast í stjórnartíðindum í dag, föstudaginn 19. febrúar 2021, þar sem Fiskistofu er gert að bjóða loðnu á skiptimarkaði og er tímafrestur tilboða ákveðinn til þriðjudagsins 23. febrúar 2021.

Tilboðsmarkaðurinn opnar klukkan 10:00 föstudaginn 19. febrúar 2021. Ekki er gerð krafa um lágmarkstilboð. Athygli er vakin á því að tilboð skulu hafa borist fyrir kl. 16:00 þriðjudaginn 23. febrúar 2021.

Í boði er neðangreint aflamark í skiptum fyrir aflamark í þorski (ekki krókaaflamark). Við mat tilboða er stuðst við meðalverð aflamarks síðasta mánaðar. Viðmiðunarverð síðasta mánaðar: þorskur 271,67 kr/kg.  

Fisktegund Þíg Aflamark  
Loðna 0 (0,13)* 2.635 tonn

 

Eingöngu er unnt að gera tilboð í gegnum UGGA, upplýsingagátt Fiskistofu. Tilboðsmarkaðinn má finna undir Umsóknir/Þjónusta. Vakin er athygli á að Ugginn sendir sjálfkrafa staðfestingu um móttöku tilboðs.

Athugið að samkvæmt gjaldskrá Fiskistofu (http://www.fiskistofa.is/umfiskistofu/gjaldskra/) ber að greiða 11.300 krónur fyrir hverja úthlutun aflaheimilda á tilboðsmarkaði. Þannig ber tilboðsgjafa að greiða þá upphæð fyrir hvert tilboð sem tekið er að fullu eða að hluta.

Afturköllun tilboða eftir að umsóknarfrestur er runninn út er óheimil. Að gefnu tilefni er rétt að benda bjóðendum á að skv. 2. mgr. 4. gr. reglugerðar 726/2020 sem fjallar um þennan tilboðsmarkað, eru það eingöngu bjóðendur, ekki Fiskistofa, sem er heimilt að afturkalla tilboð svo lengi sem þeir gera það áður en tilboðsfrestur er liðinn. Því er mikilvægt að yfirfara tilboð vel áður en því er skilað og skoða tilboðið undir „Málin mín“ í UGGA eftir að tilboðinu hefur verið skilað til að tryggja að allt sé rétt. Ef mistök hafa átt sér stað við tilboðsgerð þá getur bjóðandi afturkallað tilboðið í UGGA allt þar til tilboðsfrestur rennur út.

Frestur til að skila tilboðum er til kl. 16:00 þriðjudagsins 23. febrúar 2021.


* Athugið að vegna tæknilegra örðugleika þarf Fiskistofa tímabundið skrá þorskígildisstuðul loðnu í fyrri stuðul (0,13) og kann það að hafa áhrif á útreikning annarra þátta, s.s. veiðiskyldu. Þegar tilboðsmarkaðinum lýkur mun stuðullinn verða 0 aftur og þeir þættir sem urðu fyrir áhrifum af breytingunni leiðréttast.



Finna skip

Tungumál síðu




banner2
Þetta vefsvæði byggir á Eplica